Kenang Aku.....Senentang Meda TV

Kelia.........80an!!!!

Tu gamal Tv kami kelia....14 inci, enda nemu nama brand!!!

Dulu menya....Tv kami bakatu, pemesai iya 14 inci, nadai kaler(Hitam/Putih), enda ngena karan api injin sesco baka ka diatu, enti deka masang semina ngena bateri kerita. N40....umbas iya pemerat.

Maia nya suba, ba rumah panjai kitai di Lubau, nadai maioh ka bisi Tv, sepintu dua aja ka bisi, enggie kitai nyau kelama baru bisi, kadang-kadang enti deka meda tv nyau ngagai bilik orang ka bisi tv.....aku enda ingat agi ni maia kitai nyau bisi tv maia nya suba. Nyau kepuas, engka laban ketegal pengeliat ati sida Apai enggau Indai maia nya suba, engka ketegal enggai mega alah ari urang bukai kini, enggai ka bala anak ngining urang meda tv, nya baru nyau kelama baru kitai ulih ga meli tv baka urang bukai. Bala sida Apai Ninok,Indai Imbuh, Indai Roy, Indai Da, Apai Marshal engka agi ga ingat ni maia ka meli tv maia nya suba, sapa ka nurun meli tauka sapa meli, ba pasar ni kini, di Betong ka?, sekali ka di Simanggang tauka di Debak?

Lalu mulai ngagai pengawa ka bepeda ka tv, maia jemah nya suba, tusah endar ga, selalu abis bateri, bateri semina ulih kena dalam kandang seminggu lebih aja, nitih ka penyuah ka bepasang ka iya ga, suah agi masang, jampat agi ga bateri abis, udah nya enti maia bateri ka abis, lalu anjung ga cas, asuh bai van Liok, van Panang, van anak akie, van kaji tauka ba van Apai Wat, bala sida ka bedagang ngena van tu mih ka mai bateri ke pasar ngecas iya, nyau hari siti baru datai,enti datai, sekali ngechas maia nya enti enda salah ingat aku asai ka tiga ringgit kini? Kadang-kadang beasuh-asuh ka ngerinan mai pemerat bateri ngagai tisi jalai endur ka ngambat van, meda tv ka endar!!!, ngechas beasu-asuh, kami duai Apai Owen ka suah agi nganjung ngechas ngagai van......laban ka ngarap ka upah meli sekelim ba Panang......!

Maia nya mega semina rtm satu enggau dua aja, ka ulih peda,nya pan enda tentu terang endar, nyin endur engkah tiang tv....puchuk perabung rumah, ni baka ka kemaya hari tu, nyau bisi Astro......senegar nekan ka "Remote Control", semilih ni "channel" ka deka di peda. Tv kami suba nyau ulih musin ka suis kena milih "channel", taja ka dua iti aja "channel"....

Kelia maia nya mega, nama bilik bisi tv udah manah endar, ukai nya murah ga rega tv maia nya, bebendar ngerejang getah, begumpul ka buah lada enggau sida Apai enggau Indai. Udah bisi tv lantang amai ati kitai sebilik, enda kiruh ngagai bilik urang bukai agi bepeda ka tv.

Diatu.......2010!!!!

Tv kemaia hari.....LCD tauka Plasma!!!!

Rauh-rauh bala anak ngasuh bebeli ka tv(Baka gambar ka datas tu), Tv LCD.....akai nyau begaru pala gasak, munyi ko Mau, enda ulih gaga begeru-geru enti bakatu munyi ko Apai Ninok, ba ati ka endar mih meli, tang? nemu-nemu lah!!!!

Nya mih enti maia ke pasar kiruh endar nyeliah ka kedai ka nyual tv LCD, ni ulih seliah ka, bala sida anak nemu agi ari kitai diatu, enda sida nemu maioh agi pekara bukai ka lebih penting ari tv, tv ka diatu pan di kira aku udah chukup manah, ukai enggai meli, tang nganti maia ka nyau pama-pama agi ga, enda pia!!!!?

Bala sida anak ukai nemu utai nadai, peneka sida ka nyebut, uji ti sida baka kami suba, baru sida nemu, udah nasib maia agi mit suba kami ulih meda tv, taja pan tv nadai kaler. Udah manah sida ada lalu bisi tv, tu meda tv ka biasa bisi Astro agi, nya pan sida lalu ka tv ka manah agi baka LCD.....atai....deh eeahhh!!!!! chukup nyamai nyebut.

Ka penudi.....tu semina leka kenang aku ba ditu aja, di kena mulai ka pengingat senentang kami lebuh maia kelia menya bepeda ka tv.

Kenang ka bukai ila mantai ka baru.

Terima Kasih!!!!!!