Ajang La-Bakih Lama Apai Ninok
Tu meh kaban lama tauka kaling Apai Ninok maia agi biak menya, tu mah pangan ti sama serambau enggau iya kelia. Seduai sama madah ka pengaga ati serta pengelengau diri empu pangan diri. Enda nemu berapa taun seduai udah enda betemu enggau pangan diri?Seduai endang bakih kenyau ari suba, lama endar seduai udah enda betemu enggau pangan diri di pelaba ka aku, ngelama tu semina ninga rita diri sama diri aja, ni enda deh siko nya ga diatu nyau diau mindah di ulu Batang Rajang mua ka Kapit, sigi jarang endar nemuai pulai ka menoa.
Tang maia Gawai tu tadi sida Ajang La bisi nemuai pulai Gawai, sampal magang sida sebilik ko iya, nama deh nyadi endar seduai lebuh maia ka betemu enggau pangan diri, tambah mega maia Gawai ga, nyau enda berasai seduai iya numi pangan diri ngirup, maioh cherita seduai, ni enda deh gah nyau mulai ka pengingat diri meh seduai. Jarang ga meda Apai Ninok tak chun endar ga randau ka bakanya, tak nyinuk ninga seduai ka berandau. Ari cherita seduai iya kami nemu seduai sigi lama udah enda betemu enggau pangan diri. Kami endang enda enggau seduai ngirup, laban semina neju ka seduai iya berandau kediri aja, semina mansa serta ngerimbas pending aja utai ti di kerandau ka seduai. Bisi ga rindu ninga, tang enda ngachau lalu nyampur seduai ka berandau.
Tu meh Gaya kitai enti udah kelalu lama enda betemu enggau kaban tauka bakih maia agi mit tau ka maia agi bujang kelia, untung endar seduai iya begulai begawai taun tu.
Ngagai seduai aku ngarap ka seduai sama-sama mujur dalam semua pengawa lalu ulih betemu baru maia Gawai taun baru nyin ila.
No comments:
Post a Comment