23hb ~ 26hb July 2010: Lumba Perau Sungai Layar, Betong.

Ubit nyau sibuk ngibun perais, enggai ka di taban ka orang.........

Naka pemaioh orang ka datai meda, nyau sekut pasar Betong, kedai makai mee pan nyau penuh, jalai raya sekut laban pemaioh kerita, nyau lelak bala polis trafik nulis surat saman, nyaman kerita ka parking sebarang, nyau krem tunjuk jari nulis surat saman..........

Sayau endar enda ulih enggau begau meda orang belumba perau.......

Sekeda ari gambar belumba perau kemari............

Lumba perau tauka "Regata Betong 2010", naka mih pengerami meda orang lumba perau tu neh, ke temu aku lama udah nadai kala lumba perau ka bakatu di Betong, ba temu aku kelia menya bisi sekali iya ti agi kingat ka aku, maia agi mit, enti enda salah ingat aku.

Maia nya suba, kala di bai sida Apai bemalam ba kerangan enggau orang ngitu perau pelumba sebedau ka di bai ka Betong pagi siti, maioh ga kitai serumah maia nya enggau bemalam ba kerangan, semalam sama bejaga serta tinduk di kerangan.

Lebuh datai di Betong lalu ngaga langkau tauka kem ba tebing ai Layar, sepiak-sepiak tebing ai Layar nyau penuh laban langkau tauka kem ti di gaga orang endur diau serta enggau diau bemalam sekumbang ka maia orang ka belumba perau.

Tang ba awak ka sekali pelaba aku bisi ga kitai serumah enggau orang belumba, laban maia ka pulai ke rumah suba bisi ga aku meda perau pelumba ba stisin......enti sema sida bisi enggau, aku ngajih ka sida bisi tulih lumur lebuh ka belumba tu ila.

Ila Ubit ngirum gambar ka kitai.