Projek "Together As One Kays Club" Apai Indai Aki Ini Kitai.

Lemai tadi pulai kerja shift siang aku beguai ke Piasau laban deka nganjung Aki Unie ngagai 'Acupunture' enggai ka cina nyau tutup. Aku datai di piasau kira pukul 8.30 malam, Indai Robert enggau Aki Unie endang udah nganti aku, kami tiga pan lalu mupok ngagai cina, endur cina nya enda tentu jauh ari rumah sida Indai Robert,sama di Piasau.

Datai ba endur cina, nasib endar ga tumu mimit, cina nya baru ka besikap ka tutup, meda kami datai iya lalu ngelalu ka penatai kami tiga, laban endang ngelala tudah Aki Unie enggau Indai Robert, dia deh cina nya nyamai endar di bai berandau, tu iya ke empat kali udah kami nganjung Aki Unie betuchuk 'Acupunture' dia, semua ungkus bebayar dia kira ka udah manggai RM120/-sekali betuchuk RM30/- nya pan semadi cina nya nemu kami kaban Apai Ann (Siong) enti enda sekali betuchuk bayar sigi endang RM50/-.

Cina nya madah ka iya nyau majak manah, jari iya nyau dangkat ka iya enggau mudah agi. Lalu ko cina nya, kira ka 2~3 kali baru okay agi ga.

Kami agi ka nganjung iya kia baru dalam kandang 2~3 hari iya ka deka datai tu, bisi bala bukai agi udah madah deka sponser iya, baka Well madah ka sponser sekali 'Acupunture', Apai Tuan udah sekali sponser iya betuchuk, lalu Apai Biby bisi madah ngagai aku iya sponser 2 kali 'Acupunture'. Impie sponser meli ubat lalu bisi madah ka sponser nganjung beguntin bok. Nyadi utai ka bakatu nyamai endar sepi aku laban sama besaup ngeluar ka naka anak belanja.

Pia mega kami agi ngarap ka uchu iya baka Dom Langan enggau Indu anak Megong bisi datai ngabas iya, laban nyetuk ka sari tu, lalu bedau ga seduai iya datai ngabas tudah Aki sida tu. Talipaun enggau SMS suah endar udah ngagai sida, tang selalu madah ka diri bedau bisi hari enggau nadai utai di kena mindah, taja pan pia kami agi ngarap ka seduai ulih datai ngabas Aki Unie, laban tudah tuai suah endar muchau laban iya lalu bedau betemu enggau sida iya, baka Indai Tan baru ka sekali nyengok iya ba rumah sida Indai Robert, udah nya lalu nadai agi.

Pengudah ka pulai ari endur 'Acupunture' malam tadi, maioh endar udah insur iya ka di asai ka Aki Unie, iya empu pan madah ngagai aku jauh endar udah nyamai ari ka terubah datai kemari, kaki iya pan nyau nadai di peda sup agi, pejalai iya pan udah manah serta enda betungkat agi, udah ulih bejalai manah agi ari ka dulu, ubat ka di beri spital sari nya endang enda tinggal dempa iya, ubat ka beli aku ba Pamarsi sarinya semina enti dua hari meh iya udah makai, laban ubat nya enti bisi berasai pedis baru makai. Kitai agi ngarap ka Aki Unie tau ulih jampat gerai.

Amien!

Terima Kasih.