Mr. Deepavali Mingoi Kaban Lama Taun Kelia Menya

Mr. Deepavali Mingoi

Terima Kasih Ka Pengingat Nuan Ka Kami Sebilik..........

Tu ka ulih di kingat ka aku pasal anembiak tu suba, nyadi iya tu suba nitih ka bala sida iya sebilik ka gawa di Betong, enti enda salah aku engka tak kaban aya iya kini, bala sida tu sebilik pan ukai urang bukai ga, sida iya kena kaban Apai Rubat, sama ari Lubuk Bukut Balingian.

Maia tu suba iya nitih bala iya ka gawa di Betong lalu diau di pasar Betong lalu enda jauh ari rumah sida Apai Atu suba, nyadi laban nemu diri sekaban,lebuh sama begulai di Betong, dia deh kami lalu majak ngelala pangan diri. Maia nya enti enda salah ingat aku bisi siku agi menyadi lelaki iya enggau iya maia tu menya, kada enda menyadi iya tu ka digigit kera ba jari maia kami ka pulai ngabang Krismas ari Entanak menya, agi ingat ka nuan Apai Owen?

Nyau pengelama ka begulai enggau sida Deep tu, kami nyau baka ka ukai urang bukai agi enggau pangan diri, nyau baka diri menyadi maia nya, nyadi lebuh maia kemisi sekula, Deep bisi enggau kami pulai ka Lubau, iya nya rumah lama kitai suba, lama ga iya enggau kami di Lubau suba, ngabis ka kemisi sekula bulan duabelas maia nya, maioh pengawa di kerja kami lebuh maia nya, iya pan enggau kami ngerejang getah kitai di Bukit Bait, rindu endar maianya, kami sida Apai Mashal, Apai Owen, Aku, Indai Da,Indai Gee,lalu enggau Mau taja pan Mau maia agi mit tang udah bisi endar pengingat iya ba maia tu,Apai Tuan pan umbas iya pengemit ga maia tu, tiap kali nurun pagi ngerejang getah diulu ka Apai seduai Indai kami endang gagit endar ati, lalu berebut dani pagi laban ka berumpak sapa dulu datai di Bukit Bait, lalu berumpak sapa dulu tembu ngerejang getah mega, sapa dulu abis lalu mangkung tin milo ti di gantung kami ba kayu ba atas Bukit Bait, lalu tau ngenat kadiri garing-garing nganti maia ka muat getah, chukup gaga serta chukup pengerindu lebuh maia nya, maioh getah ulih kami, laban kami enggai alah gasak bala sida Apai Didit sebilik ga maia nya, bala sida James enggau Andak.

Nyadi siti utai ti bangat ngerindu ka kami maia nya, iya nya rindu ninga tudah Deep tu bemain gita, landik endar main gita, kami selalu bemain gita sebelah tanju,di ruai, iya pan landik endar belagu, ngaga leka lagu kediri, siti ari lagu ka agi ulih ingat aku iya nya lagu "Apai Woo...".

Kami maia nya pan suah bemain mandi ke ai Layar, nyemerai lalu merau sebelah ai Layar.......

Aku enda nemu maia, ni maia kami nyau beserara enggau sida Deep tu suba, entah tak enda nemu kini penunga pangan diri agi mih maia nya, laban nyau mulai ka diri ka sekula magang ga kami maia nya, diau ba "boarding"(Bemalam ba sekula)

Engka Apai Owen bisi agi pengingat ba sentang tu, tang taja pia aku gaga endar ati laban ari blog Keranganpanjai tu mih kitai ulih betemu ba "ruang maya" baka ka kemaia hari tu.

Terima kasih ka nuan Deep laban ulih "trace blog" kami tu......suah ka agi mih nemuai ngagai blog kami tu, sama betundi mansut ka penemu diri, awak ka nemu rita pangan diri, taja kitai sama jauh enggau pangan diri. Tu mih gaya kami ngulai pangan diri sebilik, begempung lalu beserakup dalam Kays Club.

Terima Kasih!!!!!